"Boburnoma"da qo'llangan sinonimlar lug'ati

Цитата:
Олимов Мирзааҳмад Ҳошимович 1981 йилда собиқ Тошкент Давлат университети (ҳозирги Ўзбекистон Миллий университети) ўзбек филологияси факультетини ўзбек тили ва адабиёти ихтисослиги бўйича имтиёзли диплом билан тугатиб, 1982-1983 йилларда Ўзбекистон Республикаси «Фан» нашриётида кичик муҳаррир, 1983 йилда «Ўзбекистон адабиёти ва санъати» ҳафтаномасида мухбир бўлиб ишлади. 1983 йил охирида ЎзР ФА Алишер Навоий номидаги Тил ва адабиёт институти адабиёт назарияси бўлимига ишга ўтиб, у ерда 1995 йилгача лаборант, катта лаборант, кичик илмий ходим, илмий ходим ва катта илмий ходим лавозимларида ишлади.

Раскрыть

1995 йил август ойида М.Ҳ.Олимов ЎзР ФА ва Ўзбекистон Республикаси Олий ва ўрта махсус таълим вазирлиги кадрлар бошқармаларининг йўлланмаси билан Бухоро Давлат университетига малакали мутахассис сифатида ишга юборилди. У ўзбек адабиёти тарихи кафедрасида дастлаб катта ўқитувчи, 1996 йил 1 майдан 1998 йил 2 декабргача кафедра мудири вазифасини бажарувчи ва кафедра мудири лавозимларида ишлади. 1998-2003 йилларда (академик таътил билан бирга) БухДУ ҳузуридаги докторантурани ўтади. 2003 йил 3 июндан ҳозиргача кафедра доценти лавозимида ишлаб келмоқда.

М.Ҳ.Олимов 1995 йилда «Ҳозирги ўзбек адабиётида пафос муаммоси» мавзуидаги номзодлик диссертациясини ЎзР ФА Тил ва адабиёт институти ҳузуридаги Ихтисослашган илмий кенгашда муваффақиятли ҳимоя қилди. У 1995 йилдан бери филология фанлари номзоди.

М.Ҳ.Олимов – талабчан, билимдон, моҳир педагог. У «Жаҳон адабиёти тарихи» фани ва «Аруз назарияси» махсус фани бўйича маъруза ва амалий машғулотларни юксак савияда ўтиш билан ҳамкасблар ва талабалар эътирофини қозонган. У Бухоро вилоят халқ таълими педагог ходимларини қайта тайёрлаш ва малакасини ошириш институтининг тиллар кафедрасида ҳам ўриндошлик асосида ишлаб келмоқда.

М.Ҳ.Олимов – «Ҳозирги ўзбек адабиётида пафос муаммоси», «Рисолаи аруз», «Бобурнома»да Аллоҳ илмлари ва сифатлари талқини», «Рисолаи сарф ёки анъанавий морфология», «Бобурнома»да қўлланган синонимлар луғати» каби китоблар ҳамда 40 дан ортиқ илмий ва ўқув-услубий мақолалар муаллифи. Унинг илмий ишлари Россия Федерацияси ва Эрон Ислом Республикаси журналларида ҳам чоп этилган. Унинг «Мирзоларнинг бошлари» мақоласи «Йилнинг энг яхши мақоласи» конкурсида «Тафаккур» журналининг 2002 йилги совринига сазовор бўлган.

Цитата:
Ушбу асар ўзбек тилшунослигида алоҳида ёзма ёдгорлик тили бўйича яратилган биринчи синонимик луғат ҳисобланади. Уни шунчаки луғат эмас, луғат-тадқиқот деб аташ мумкин. Муқаддимада ўзбек тилининг бой синонимик хазинаси, ундаги арабий, форсий, туркий қатламлар ва унинг «Бобурнома»даги нашъу намоси ёритилган бўлса, луғат ичида синонимик қатор ҳосил қилган алоҳида сўзларнинг лисоний мансубияти, грамматик шакллари, услубий бўёғи кабилар ҳақида эътиборга молик фикрлар билдирилган.
Асар филолог олим ва мударрислар, ўзбек филологияси ва журналистика факультетлари талабалари, ўзбек тили ва адабиёти ўқитувчилари ҳамда тилимиз бойлиги билан қизиқувчи барча китобхонларга мўлжалланган.

Поделитесь записью в соцсетях с помощью кнопок: