Erkin A'zam.Olam yam-yashil / Эркин Аъзам. Олам ям-яшил

Цитата:
Адабиётга, маънавиятимизга фидоийлик билан ҳисса қўшиш борасида ардоқли адибимиз, таниқли ёзувчи, "Тафаккур" журнали бош муҳаррири Эркин Аъзамнинг ҳам ўзига хос ўрни бор. Унинг илк китоби "Чироқлар ўчмаган кеча" 1977 йилда эълон қилинди. Шу йили "Отойининг туғилган йили" қиссаси учун ёшлар мукофотига сазовор бўлди.

Ўша йиллари китобхонлар назарига тушган "Анойининг жайдари олмаси" ҳикоясидаги Рамазон, "Отойининг туғилган йили" қиссаларида ёшларимизнинг ижтимоий-маънавий қиёфасини тасвирлаб берди. Одамийлик, меҳр-оқибат, ҳалоллик, ҳақиқат туйғуларининг инсон ҳаёти учун энг зарур фазилат эканлигини ёрқин тимсолларда ифода этди.

1991 йилда "Ёшлик" журнали ташкил этилиб, Эркин Аъзам наср бўлимини бошқарди. Ундан сўнг Ғ.Ғулом номидаги Адабиёт ва санъат нашриётида бўлим мудири сифатида фаолият кўрсатди. Шу йилларда "Олам ям-яшил", "Жавоб", "Байрамдан бошқа кунлар", "Пакананинг ошиқ кўнгли" асарлари дунё юзини кўрди. Ушбу асарларида ёрқин характерлар галереясини яратди. Қалби тоза, иймони бутун инсонлар ҳаёти ушбу асарларнинг асосий мотивини ташкил этади.

Ёзувчи 1994 йилдан ҳозирга қадар "Тафаккур" журналининг бош муҳаррири сифатида фаолият кўрсатиб келмоқда. "Тафаккур"ни том маънода тафаккур даражасига олиб чиқди. Айниқса, журналнинг ҳар бир сонидаги бош муҳаррир саҳифасида миллий-ижтимоий ҳаётимизга оид долзарб муаммолар жуда таъсирчан баён қилинади.

2001 йилда адибнинг икки китоби-"Пакананинг ошиқ кўнгли" ва "Кечикаётган одам" китоблари нашр этилди. Ушбу китобларга кирган "Шоирнинг тўйи", "Чапаклар ёки чалпаклар мамлакати" қиссаларида ноҳақ қатағонга учраган адибларимиз сиймоси акс эттирилган. Шунингдек, собиқ тоталитар тузумнинг инсон эрки, шахсига нисбатан бир ёқлама муносабати афсонавий бир мамлакат тимсолида ўз ифодасини топган.

2007 йилда ёзувчининг "Жаннат ўзи қайдадир" китоби нашр этилди. Бу ҳақда матбуотда кўплаб мақола, тақризлар ёзилди. Китобга кирган "Ёзувчи" ҳикояси адабиётимизда алоҳида ҳодиса сифатида эътироф этилди.

Кейинги йилларда адибимиз киноқисса, драматургия соҳасида ҳам самарали меҳнат қилди. "Анойининг жайдари олмаси", "Пиёда", "Сув ёқалаб", "Забаржад" киноқиссалари аллақачон ўз мухлисларини топиб улгурди. "Жаннат ўзи қайдадир", "Шажара" драмаларида бугунги кунимизда инсон қадр-қимматини маҳорат билан тасвирлай олди. Ёзувчи бутун ижод йўли давомида ўз эътиқодида собит туриб келаётган ижодкордир.

Поделитесь записью в соцсетях с помощью кнопок: