Манелер ве чынълар - Топлагъан ве ишлеген Риза Фазыл

Сайгъылы окъуйыджы! Элинъиздеки китап Гъафур Гъулам адына Эдебият ве саньат нешрияты тарафындан сонъки йылларда чыкъарылгъан экинджи фольклор джыйынтыгъыдыр. 1971 сенеси нешр этильген «Къайда бирлик – анда тирилик» адлы биринджи джыйынтыкъкъа аталар сёзлери кирсетильген эди. Бу китапкъа исе, халкъымызнынъ агъыз поэзиясынынъ джевэр ташлары олгъан манелерден, чынълардан ве ногъай бейитлеринден нумюнелер кирсетильди.

Джыйынтыкътан файдаланувны къолайлаштырмакъ макъсадынен манелерге номерлер къойылды, чынъларнынъ исе айры мевзуларгъа болип дердж этильмеси – бу биринджи ынтылыштыр.

Бу джыйынтыкъкъа материал топлав ишинде мерум фольклорджыларымыз Самедин Бекиров ве Абдураман Бари Аджимендиль баягъы ярдымда булундылар. Къарасувбазар районы Семен койи чынъждыларынынъ аньанесини девам эттирген чынъджы Себиля аптенинъ къызы Сабрие Селяметова озь анасынынъ агъызындан эшиткен чынъ ве манелерни зеининде сакълап бу китапны дегерли материалларнен теминлевде айрыджа ярдымда булунды.

Джыйынтыкъны азырлав вакътында «Ленин байрагъы» газетасында басылгъан материаллардан ве халкъ яратыджылыгъыны актив суретте топлагъан Аджи-Султан Мустафаева, Абселям Османов, Зекерья Болатов, Умер Меджит, Мамбет Болатов, Айше Аблязизова, Урмус Къутубзаде, Эдем Билялов, Фахри Аблаев, Сеит-Нафе Муртазаев, Алядин Аджитаров, Джафер Къуртсеитов аркъадашларнынъ материалларындан, айны заманда «Совет эдебияты» журналындан ве К. Джаманакълынынъ «Чынълар ве манелер» китабындан да файдаланылды.

Джыйынтыкънынъ мейдангъа кельмеси ве дюнья юзю корьмесинде языджыларымыздан Шамиль Алядин, Эшреф Шемьи-заде, Юсуф Болат ве дигер аркъадашлар шахсий ярдымда булунды ве файдалы тевсиелер яптылар.

Поделитесь записью в соцсетях с помощью кнопок: